صليبي تقيل يارب

صليبي تقيل يارب


حدث بالفعل
في احدي الايام اصيبت امرأة تعرف المسيح جيدا ومؤمنه
بالمرض الخطير ( كانسر )
اللي تطلق عليه الكنيسة مرض الفردوس
وفي احدي الأيام اشتد عليها الألم لدرجة وقفت امام صورة رب المجد يسوع المسيح تنادية بحرقة من اعماق قلبها
ربي والهي اشفيني وخفف عني صليبي ... صليبي تقيل اوي ومش قادرة عليه
خفف مرضي مش عشاني انا عشان اولادي الصغيرين
مين هيرعاهم ويربيهم
وهي نايمة يااخوتي الأحباء
جاء اليها المسيح في الحلم وقال لها
انتي مالك زعلانه ليه يابنتي
بتقولي صليبك تقيل
طب تعالي معايا انا هوديكي حته كويسة خالص
وراح وداها غرفة واسعه جدا والغرفة دي كانت مليانه صلبان كتير اوي
وقالها اختاري الصليب اللي انتي عاوزاه وخديه وسيبي ياستي صليبك التقيل اللي انتي بتقولي عليه
الست قالتله اشكرك يارب وفرحت اوي
وفعلا بدأت تتمشي في الغرفة تبحث عن صليب تحمله بدلا من صليبها الثقيل وهو المرض
شالت اول واحد لقته تقيل
قالتله يارب ده تقيل اوي اوي
قالها خلاص طالما ده تقيل سيبيه واختاري واحد تاني
اختارت واحد تاني وشالته
لقته تقيل برضه
قالتله يارب ده برضه تقيل
قالها خلاص سبيه واختاري اللي انتي عاوزاه
لقت صليب جميل وشكله حلو ومليان جواهر .. المهم شالته لقته خفيف
قالتله يارب هو ده اللي انا عاوزاه
ارجوك اديهوني وخد صليبي التقيل
قالها طب اقلبيه وشوفي اسم مين اللي مكتوب عليه
مسكت الصليب وشافت الاسم المكتوب عليه من ورا لقت اسمها هو اللي مكتوب
فقالتله يارب ده اسمي اللي مكتوب عليه
قالها طب يابنتي ماهو ده صليبك اللي انا مديهولك من البداية واسمك اهو اللي مكتوب عليه
امال تقيل ازاي ؟؟؟
ومن هنا صحيت من النوم
وقالت اشكرك يارب وهي بتبكي بحرقة
اشكرك يارب علي صليبي هذا بدلا من الصلبات التقيلة التانية
بالرغم من انه مرض الموت وهو ( السرطان ) لكن شكرت ربنا


اخوتي الأحباء
الله لا يعطي انسان حمل اكثر من طاقته
ولكل واحد الصليب اللي يقدر عليه ويقدر يشيله
بعد كل اللي عملته وكل الصلبان اللي شالتها
لقيت ان صليبها اخف صليب وهي قادرة عليه

فالمر الذى تختارة لى يارب أجمل وأفضل وأحلى من الشهد الذى أختارة لنفسى

منقول